Kamonyi-Runda: Abana b’abakobwa babyariye iwabo batagejeje ku myaka y’ubukure barasaba gusubizwa mu ishuri.

Ibiro by’Akarere ka Kamonyi (Photo internet)

Abana b’abakobwa babyariye iwabo batagejeje ku myaka y’ubukure bo mu murenge wa Runda mu karere  ka Kamonyi bari mu ishyirahamwe ryitwa REBA EJO barasaba ubuyobozi ko bwabatera inkunga  bakajya kwiga imyuga kugirango nabo bazabashe kwibeshaho mugihe kirimbere ,ntawe bagombye gutegera amaboko.

Bamwe muri aba bana, bavuga ko bakimara kubyara bagiye bakorerwa ihohoterwa ritandukanye, ndetse imiryango ya bamwe muri bo bakabatoteza. Ibi, ngo byaterwaga ahanini no kuba ababyeyi babo batarabashije kwakira kuba baratwaye inda batarageza imyaka y’ubukure, ibintu byatumaga nabo bigunga kubera akato babaga bahawe.

Nyuma yo kwibumbira hamwe bakabasha kugira imwe mu mishanga y’ubworozi buciriritse bakora, kuri ubu barasaba ubuyobozi kubafasha bakaba basubira mu ishuri, kuko abeshi muribo ngo bagarukiye mucyiciro rusange cy’amashuri yisumbuye (Tronc commun), bityo bakaba bifuzaga kwiga amasomo y’imyuga y’igihe gito, kugirango babashe kugira icyo bazigezaho batagombye kugira uwobategera amaboko .     

Umuyobozi wa karere ka Kamonyi Kayitesi Alice avugako  ubufasha bwo kwiga babuhabwa kimwe  nabandi bana batishoboye, ariko kubaba bakeneye ubundi bufasha bwihariye ngo biciye mu Murenge kugera ku Karere bakaba babubona kugirango babashe kwiga.

Agira ati:”Kugeza ubu, ubufasha bahabwa babuhabwa nk’undi mwana wese utishoboye, kuko bose ntabwo baba bafite ibibazo bimwe by’ubushobozi. Ubuyobozi bwose bubegereye ku rwego rw’Umurenge bariya bana burabafasha by’umwihariko ku bashaka gusubira mu ishuri, ibyo babona badashobora kuba babafasha, bakabigeza ku Karere tukareba icyo twabafasha, tukaba twanabashakira abandi bafatanyabikorwa badutera inkunga mu gufasha bariya bana.”

Ishyirahamwe Reba Ejo rikaba kuri ubu rifite abana b’bakobwa babyariye iwabo barenga  mirongwinani aho bibumbiye mumatsinda ane.

Ni mu gihe ibarura ryakozwe mu karere ka Kamonyi umwaka ushizwe wa 2018, nk’uko uyu muyobozi w’akarere akomeza abivuga ryerekana ko abakobwa babyariye iwabo batagejeje ku myaka y’ubukure  bo muri aka Karere ka Kamonyi bagera kuri maganatatu na mirongwine na barindwi.

Jean Claude Byukusenge