Igitabo cya Mukasonga Scholastique cyakinywemo filime

Igitabo cyitwa ‘Notre Dame Du Nil’ cyanditswe n’Umunyarwandakazi Mukasonga Scholastique, cyakinywemo filime ishobora kuzerekanwa mu iserukiramuco rya filime rikomeye ku Isi rizwi nka Festival de Cannes.

Notre Dame Du Nil ni igitabo cyanditswe na Scholastique Mukasonga, umunyarwandakazi uba mu Bufaransa.

Iki gitabo cyasohotse mu 2012, cyanahawe ibihembo mpuzamahanga bibiri ari byo Prix Renaudot na Prix Ahmadou Kourouma.

Muri iki gitabo Mukasonga agaragaza itotezwa ryakorerwaga abakobwa b’abanyeshuri bakomokaga mu bwoko bw’Abatutsi mbere ya Jenoside yakorewe Abatutsi mu 1994.

Umwanditsi avuga ibyabereye mu kigo cy’Amashuri yisumbuye cyitwaga Notre Damme Du Nil cyari icy’abakobwa gusa.

Nyuma y’imyaka umunani iki gitabo gisohotse, ikigo gikora filime cyitwa Les Films Du Tambour kiyobowe na Marie Legrand na Rani Massalha, bari kumwe n’umuhanga mu gutunganya filime Atiq Rahimi, baje mu Rwanda gukora filime ishingiye kuri iki gitabo.

Ibikorwa byo gukina iyi filime byarangiye mu cyumweru gishize, byari bimaze ibyumweru bigera ku munani.

Mu kiganiro IGIHE yagiranye na Munyeshuri Innocent umunyarwanda uri mu bayoboye iyi filime, yatangaje ko iyi filime yakiniwe mu Karere ka Musanze aho bamaze icyumweru kimwe no mu Karere ka Rutsiro mu ishuri rya Murunda aho bamaze ibyumweru birindwi.

Iyi filime yakinwemo n’abakobwa b’abanyarwandakazi bagera kuri 20 barimo abagera ku munani bakinnye imyanya y’ibanze.

Biteganyijwe ko izerekanwa mu Iserukiramuco Mpuzamahanga ribera mu Bufaransa mu Mujyi wa Cannes (Festival de Cannes) rizaba umwaka utaha ndetse n’aba bayikinnyemo bakazajyayo.

Ati “Ubu bagiye kujya kuyitunganya, nirangira izasabirwa kwerekanwa muri Festival de Cannes. Ntituramenya abakinnyi bazajyayo kuko ntiranemerwa, gusa ubwo bizaterwa n’uko abayikoze bazabipanga.”

Iri serukiramuco rya filime riteganyijwe kuba ku wa 14 kugera ku wa 25 Gicurasi 2018, rikazaba ribaye ku nshuro ya 72.

Munyeshuri Innocent avuga ko kandi ari filime iri ku rwego rwo hejuru urebye ibikoresho byifashijwe, uburyo abakinnyi babanje gutozwa mu gihe cy’amezi abiri n’amafaranga yayigiyeho nubwo atifuje gutangaza ingano yayo.