U Rwanda rwagumye aho Habibah yarusize ku rutonde rwa Miss Supranational

U Rwanda rwagumye ku mwanya wa 53 mu irushanwa rya Miss Supranational, rwagiyeho mu mwaka ushize ubwo rwaserukirwaga na Ingabire Habibah.

Ku wa 07 Ukuboza 2018 nibwo hasojwe irushanwa rya Miss Supranational 2018 ryabaga ku nshuro ya 10. Ryegukanywe n’umukobwa ukomoka muri Puerto, Valeria Vazquez.

Mu bakobwa basaga 80 bahataniye iri kamba harimo n’umunyarwandakazi Uwase Clementine witabiriye ku munota wa nyuma asimbuye Munyaneza Djazira wari wambuwe uburenganzira kubera imyitwarire mibi.

Uwase yitabiriye iri rushanwa ribera muri Pologne mu gihe u Rwanda rwari rufite amota 2,1 ruri no ku mwanya wa 53 ku rutonde rusange rwa Miss Supranational.

Ni umwanya rwafashe mu 2017 nyuma y’aho Ingabire Habibah yitabiriye iri rushanwa ariko ntabashe kwitwara neza, bituma rutakaza imyaka itandutu, kuko rwari urwa 47 mu 2016.

Mu rutonde rw’uyu mwaka wa 2018 rwakozwe na Global Beauties, u Rwanda rwagumye ku mwanya wa 53 n’amanota 2,1. Uyu mwanya ruwusangiye na Finland, Jamaica, Tahiti, Ibirwa bya Maurice na Moldova.

Igihugu cya Puerto Rico gifite uwegukanye ikamba cyazamutseho imyanya ine, mu gihe Mexique na Ukriane byinjiye mu bihugu 10 bya mbere ku nshuro ya mbere.

Nk’ibisanzwe Pologne niyo iri ku mwanya wa mbere n’amanota 29, uyu mwaka yiyongereyeho ane. Belarus ni iya kabiri n’amanota 23, u Buhinde ni ubwa gatatu n’amanota 22,2, Puerto Rico ni iya kane ivuye ku mwanya wa cyenda, mu gihe Phillipines ari iya gatanu.

Ibihugu 12 birimo u Bushinwa , Haiti, Hong Kong, Guatemala, Ecosse, Cuba, Estonia, Gibraltar, Laos, Macau, Nicaragua na Singapore ni byo bya nyuma na 0.1.

Ni ku nshuro ya munani u Rwanda rwitabiriye Miss Supranational. Mu 2011 rwaserukiwe na Uwamahoro Yvonne, mu 2012 hajyayo Simbi Sabrina wabaye Miss Personality, Miss Mutesi Aurore yitabira mu 2013, Umwali Neema Larissa ajyayo mu 2014, Gisa Sonia mu 2015 aba Miss wa Afurika, Akiwacu Colombe mu 2016 , Habiba Ingabire mu 2017 na Uwase Clementine mu 2018.