ABACURUZI B’INYONGERAMUSARURO N’ABASHINZWE UBUHINZI MU TURERE BARASABWA GUKORESHA GAHUNDA YA SMART NKUNGANIRE.

Ikigo cy’igihugu gishinzwe ubuhinzi n’ubworozi RAB kirakangurira Abacuruzi b’inyongeramusaruro n’abayobozi b’ubuhinzi mu turere dutandukanye tw’igihugu, kwakira no kugira ubumenyi buhagije mu gukoresha gahunda yo kugeza ku bahinzi ifumbire n’imbuto z’indobanure hakoreshejwe uburyo bw’ikoranabuhanga buzwi nka Smart Nkunganire, kuko aribwo buryo bushobora gukemura ikibazo cy’inyongeramusaruro abahinzi  bakunze kugaragaza ko ibageraho itinze baramaze guhinga.

Nikenshi hirya no hino mu gihugu abahinzi bagiye bavuga ko inyongeramusaruro itinda kubageraho ku buryo usanga bigira ingaruka ku mihingire yabo.

Ikigo cy’igihugu gishinzwe guteza imbere ubuhinzi n’ubworozi RAB, kivuga ko iri tinda riterwa ahanini no kuba hagikoreshwa impapuro abahinzi baba biyandikishaho  kugira ngo bahabwe  inyongera musaruro zitinda kugera  kunzego zishinzwe gutanga izi nyongeramusaruro.   

Mu gukemura iki kibazo umuyobozi ushinzwe gahunda ya nkunganire mu kigo k’igihugu gishinzwe guteza imbere ubuhinzi n’ubworozi GATARI Egide,  asaba abacuruzi b’inyongeramusaruro n’abayobozi b’ubuhinzi mu turere dutandukanye tw’igihugu, kwitabira no kugira ubumenyi buhagije mugukoresha uburyo bw’ikoranabuhanga buzwi nka Smart Nkunganire.

Uyu muyobozi, yongeraho ko mu gihembwe cy’ihinga A 2020 abavuruzi b’inyongeramusaruro bazaba bataratangira gukoresha ubu buryo batazongera gucuruza inyongeramusaruro.

Usibye gukemura ikibazo cy’inyongeramusaruro zigera ku bahinzi zitinze, uburyo bwa Smart Nkunganire buzajya bufasha umuhinzi kubona inguzanyo yo kwifashisha mu buhinzi atangombye gutanga ingwate.

Biteganyijwe ko mu kwezi kwa Nzeli uyu mwaka, abahinzi bazatangira guhabwa inyongeramusaruro hakoreshejwe uburyo Smart Nkunganire.